ភ្នំពេញ៖ ក្រសួងទេសចរណ៍បានសម្រេចឱ្យមានការបើកដំណើរការអាជីវកម្មបៀរហ្គាឌិនវិញនៅទូទាំងប្រទេស តាមការឯកភាពរបស់នាយករដ្ឋមន្ត្រីកម្ពុជា សម្ដេចតេជោ។
ក្នុងលិខិតចុះថ្ងៃទី៣ ខែវិច្ឆិកា ឆ្នាំ២០២១ រដ្ឋមន្ត្រីក្រសួងទេសចរណ៍ លោក ថោង ខុន បានជម្រាបអភិបាលខេត្ត រាជធានីទាំងអស់ ឱ្យអនុញ្ញាតបើកដំណើរការអាជីវកម្មបៀរហ្គាឌិនវិញ តែតម្រូវឱ្យពិនិត្យលើវិធានការសុវត្ថិភាពទេសចរណ៍ និងនីតិវិធីប្រតិបត្តិស្តង់ដាបរមា តាមគន្លងប្រក្រតីភាពថ្មីសម្រាប់អាជីវកម្ម។
ទោះជាយ៉ាងណា លោក ថោង ខុន បានឱ្យបន្តតាមដានសកម្មភាពអាជីវកម្មជាប្រចាំដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ ផងដែរ។
កាលពីថ្ងៃទី១ ខែវិច្ឆិកា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសម្រេចបើកប្រទេសលើគ្រប់វិស័យឡើងវិញបន្ទាប់ពីសម្រេចជោគជ័យនៃយុទ្ធនាការចាក់វ៉ាក់សាំងប្រឆាំងជំងឺកូវីដ-១៩ ឱ្យអត្រានៃការឆ្លងជំងឺនេះកាន់តែថមថយទៅ៕